33 жаштагы аялды зордуктап, тоноп кетишкен шектүүлөр кармалды

Баткенде тургундун үйүнө кирип бычак менен коркутуп, зордуктап, телефонун тоноп кетишкен эки шектүү кармалды. Бул тууралуу Баткен ОИИБнын басма сөз кызматы билдирди.

Маалыматка ылайык, Баткен шаарында 4-июн күнү саат 3:00 чамасында 33 жаштагы тургундун үйүнө беткапчан белгисиз атуулдар кирип, аны бычак менен коркутуп, зордуктап, телефонун тартып алып кетишкен.

Ыкчам иликтөөнүн алкагында аталган кылмышка шектелип, Чоң-Кара айылынын 22 жаштагы А.Б. жана 21 жаштагы А.А. тургундары Баткен район аймагынан аныкталып кармалып, убактылуу кармоо жайына киргизилди.

Бул факт Баткен РИИБнин Кылмыштардын жана жоруктардын бирдиктүү реестрине катталып, Жазык кодексинин 161-беренеси (зордуктоо), 201-беренеси (тоноочулук), 190-беренеси (турак жайга кол тийбестикти бузуу) менен сотко чейинки өндүрүш иши ачылган.

Жабырлануучуга тийиштүү экспертиза дайындалып, тонолуп алынган кол телефон өз ээсине кайтарылды.

Учурда тергөө иштери жүрүп жатат.

Leave A Reply

Your email address will not be published.