Казак президенти Садыр Жапаровду «Достык» ордени менен сыйлады
Президент Садыр Жапаров бүгүн Казакстанга расмий сапардын алкагында І даражадагы «Достык» ордени менен сыйланды.
Казакстандын президенти Касым-Жомарт Токаев Кыргызстандын президенти Садыр Жапаровго «Казакстан Республикасынын жана Кыргыз Республикасынын ортосундагы эки жактуу мамилелерди бекемдөөгө жана өнүктүрүүгө кошкон салымы үчүн» жогорку сыйлык тапшырды.
Касым-Жомарт Токаев Кыргызстан терең жана тарыхый тамырлары менен байланышкан – боордош өлкө экенин баса көрсөттү.
Казакстандын президенти эки элдин бир туугандыгын бекемдөөдөгү президент Садыр Жапаровдун ролун жогору баалап, Казакстан Кыргызстан менен стратегиялык өнөктөштүктү жана союздаштыкты кеңейтүүгө кызыкдар экенин кошумчалады. Ал эки элдин жаркын келечеги үчүн түбөлүк достук жана бузулбас бир туугандык алака мындан ары дагы бекемделе берерин белгиледи.

Садыр Жапаров, өз кезегинде, Касым-Жомарт Токаевге жана бүткүл боордош казак элине жогорку баа үчүн ыраазычылык билдирип, І даражадагы «Достык» ордени менен сыйлоо чечимин Кыргызстанга жана кыргыз элине карата өзгөчө сый-урмат катары көрөрүн белгилеп өттү.
Кыргызстандын президенти баса белгилегендей, І даражадагы «Достык» ордени эки өлкөнүн ортосундагы саясий ишенимдин жогорку деңгээлин, жөнгө салынган союздаштык мамилелерди жана стратегиялык өнөктөштүктү ырастайт.
Садыр Жапаров Кыргызстан менен Казакстандын ортосундагы мамилелер өнүгүүнүн жаңы доорунун босогосунда турганын ырастады. Ал бир тууган элдердин ортосундагы жакшы коңшулаштык жана түбөлүк достук байланыштарды чыңдоого багытталган көйгөйлөрдү чечүү үчүн тыгыз жана биргелешип иштөөгө даяр экендигин баса белгиледи.
Президент биргелешкен күч-аракеттердин аркасында Кыргызстан менен Казакстандын ортосундагы өнөктөштүк алакалар эгиз элдин кызыкчылыгында бекемделип, ырааттуу өнүгө берерине ишеним билдирди.

Белгилей кетсек, Садыр Жапаров 18-апрелде Казакстанга расмий сапары менен барды. Астананын эл аралык аэропортунан аны Касым-Жомарт Токаев тосуп алды.
Садыр Жапаров кыргыз-казак жогорку мамлекеттер аралык кеңешинин алтынчы жыйынына жана Астана шаарында «Манас» кыргыз эпосунун каарманынын айкелинин ачылыш салтанатына катышат.
Сапардын алкагында «Кыргызстан – Казакстан» бизнес-форуму, аксакалдардын жана чыгармачыл интеллигенция өкүлдөрүнүн тегерек үстөлү, кыргыз-казак жаштар форуму жана илимпоздор форуму сыяктуу бир катар иш-чаралар өтөт.