Камчы Көлбаевдин уюшкан кылмыштуу тобун каржылаган ишкер кармалды
Маркум кримтөбөл Камчы Асанбектин (Камчы Көлбаев) уюшкан кылмыштуу тобун системалуу түрдө каржылоого катышкан деген шек менен С.К.К. аттуу ишкер кармалды. Бул тууралуу Улуттук коопсуздук боюнча мамлекеттик комитеттен билдиришти.
Атайын кызматтын маалыматына ылайык, шектүү жоюлган мыйзамдагы ууру Камчы Асанбек менен тыгыз байланышта болуп, Ош шаарынын жана Ош облусунун калкынын арасында колдоого ээ болуу, өзүнүн таасирин күчөтүү максатында Камчы Асанбекке жана К. Досоновго ай сайын белгилүү өлчөмдө акча каражатын которуп турган.
Мындан тышкары, алардын колдоосу менен шектүү Кыргызстанга күйүүчү-майлоочу материалдарды аткезчилик жол менен алып өтүүнүн туруктуу схемасын түзгөнү аныкталган.
Ошондой эле, Асанбек менен Досоновдун көмөгү аркылуу С.К.К. өзүнө жакпаган адамдарга карата физикалык таасир көрсөтүү үчүн уюшкан кылмыштуу топтун мүчөлөрүнүн «кызматтарына» кайрылып турганы белгиленет.
Учурда ишкер кармалып, УКМКнын тергөө абагына киргизилди. Тиешелүү тергөө иштери уланууда.